Hebrews 1
Natun ái Káláu a aposoi worwor si Kákán
1Tungu sang ái Káláu a worwor narsán rang támin i git tili ngudun tan tám worwor tus, má worwor er a hut i marán pákán má i toltolom sál mul. 2 aMái sár, tungu sár ái Káláu a tarwa Natun, ái Iesu Karisito, mái Natun sang a aposoi worwor si Kákán uri narsá git onin. Má a ngoromin ái Natun. Ái Káláu a akiláng on suri na otoi tan táit no on á naul bát má naul bim, má a aksimi naul matmatngan pokon mai limán ái Natun. 3 bÁi Natun a atalsa tari minmáir i Káláu ur si git, má ái a kipi tártárwán sang ái Káláu mul, má a sosodukul páksi tan táit no i naul matmatngan pokon mai kán worwor a rakrakai. Má ngo ákte long arahi arapilpil uri sápkin tatalen, ngorer a sukis i balsán mingin ái Káláu, Tám Pulpulus Tánráu, imi sang i bát.Natun a pakta singin tan angelo
4 cTámin i pákánbung Natun ái Káláu a kápán páplun, a gengen si di á boh angelo ngoro git sang má a kis i lalin i di. Mái sár onin ákte kaleng uri kán kiskis pakta ami iátin boh angelo. Tan angelo di tan tám arardos si Káláu. Mái Iesu, wa Natun sang ái Káláu! Má ngorer gitá mák ilmi ngo ngisán er di utngi mai ngo ‘Natun ái Káláu’ a pakta singin ngis er di utngi ngo ‘angelo’. 5 dNgorer ái Káláu ákte parai singin ngoromin,“Iau para talsai ngo á iau á Kakam má á iáu á Natung.
Má onin iakte ilwa pas iáu suri una kátlán i tan táit no.”
Mái Káláu a parai mul ngo,
“Á iau ina Kákán,
má ái na Natung!”
Ki ngádáh, a lu parai ngorer singin tan angelo? Wa kápte sang!
6 eMá kesi táit mul a parai ái Káláu i pákánbung ngo na tarwai kán Kalik alal uri naul bim, a parai ngo,
“Kak tan angelo da lotu uri narsán sang!”
7 fÁi Káláu a lu parai suri tan angelo ngoromin ngo i pákánbung a nem i di ngo da lákám ngo da lu han uranang ngo urada, ki di ngoro kihkih sár má di ngoro kurmen kámnah dik lu taram má dik han ngorer ái a nem on. 8 gMái sár, suri Natun sang, ái Káláu a lu parai ngoromin singin,
“Á iáu á Káláu.
Kam kiskis án kabisit na tur áklis,
má u lu kátlán i matananu on á kam lolsit mai tatalen a nokwan masik.
9Má kabin ukte ilwa pasi sál a nokwan má ukte tapriu alari sápkin,
ngorer ái Káláu, kam Káláu, ákte akiláng i iáu mai wel
suri una kipi tiling kiskis má tilik gasgas si di no á rang tárim.”
10 hMái Káláu a parai mul si Natun mák utngi mam Konom. A parai ngoromin,
“Á iáu, Konom, u aksimi naul bim hirá i tangkabin,
má naul bát u longoi mai limam.
11Tan táit no erei u longoi na rah besang,
mái sár á iáu kápte! Una lu kis áklis!
Tan táit er u longoi mai limam,
wa na morot sár ngorer i sulu di lu balbal oboi.
12Má ngorer una arkeles i tan táit er.
Una top on
má unák pipdai má unák obop palai uri kesi goson.
Mái sár á iáu, Natung, káp una te pupunkak.
Una lu kis ngorer sár,
má kam tan bet kápnate rah!”
13 iMái Káláu kápte a parai singin kán tekesi angelo ngoromin ngo,
“Una kis main i risán minging suri da árnga iáu,
má iau ina suka bámiai kam tan kurtara uri lalin kikim má ina arumrum di.”
14 jKápte sang a lu parai ngorer singin tan angelo, kabin tan angelo di tanián má di tám arardos sár, má ái Káláu a lu tarwa di suri da lu tangan rung er da otoi araliu.
Copyright information for
SGZ